এখন স্মৰণীয় বিয়া, যৌতুক ইত্যাদি....

      প্ৰায় দুবছৰমান আগতে বিহাৰৰ এখন সৰু চহৰলৈ গৈছিলো, এগৰাকী বন্ধুৰ ভাতৃৰ বিয়াৰ উপলক্ষ্যত। মোৰ বাবে সেই বিবাহ অনুস্থানটো বহুদিনলৈকে মনত ৰৈ যোৱা এটি ঘটনা। প্ৰথম কাৰণ – হিন্দী চিনেমাত দেখাৰ দৰে এখন বিয়া বাস্তৱত দেখিবলৈ পোৱাটো। কিন্তু এই কাৰণটোৱে বিয়াখন মনত ৰাখিবলৈ মোক যিমান প্ৰভাৱিত কৰিছিল, তাতকৈ বহুগুণে বেছি প্ৰভাৱিত কৰিছিল অন্য কেইটামান কাৰণে। বন্ধুভাতৃৰ লগত আমি বৰযাত্ৰী হিচাপেও যাবলগীয়া হৈছিল। কইনাৰ ঘৰ আছিল প্ৰায় আশী কিলোমিটাৰমান নিলগত এখন পিছপৰা গাঁৱত। সন্ধিয়া সময়ত আমি বৰযাত্ৰী হিচাপে যাত্ৰাৰম্ভ কৰিছিলো পোন্ধৰখনমান এছ.ইউ.ভি.ত এশমান মানুহৰ দলৰ অংশ হৈ। দৰা ছফটৱেৰ অভিযন্তা, মোটা অংকৰ দৰমহাৰ অধিকাৰী, বিদেশতো থাকি আহিছে এবছৰমান। গতিকে ইমান বিশাল বৰযাত্ৰীৰ দল বিলাসী গাড়ীৰে সমদল কৰি যোৱাটোত বৰ বেছি আচৰিত হোৱা নাছিলো। হয়তো দৰাৰ পৰিয়াল আৰু বন্ধুবৰ্গ বহুত বেছি আৰু সকলোৱে এই শুভমূহুৰ্তৰ সংগী হ’ব বিচাৰিছে। চহকী দৰাইও হয়তো পাৰ্যমানে খৰছ কৰিছে। কিন্তু পিছতহে জানিব পাৰিলো এই বিশাল সমদলৰ বাবে দৰাপক্ষই এপইচাও খৰছ কৰা নাই। সকলো খৰছ বহন কৰিছে কইনাপক্ষই। যিয়েই নহওক, এই যাত্ৰাত মই বিহাৰৰ বাট-পথবোৰ নিৰীক্ষণ কৰাৰ চেষ্টা কৰিছিলো। তেতিয়া নিতীশ কুমাৰে বিহাৰক উন্নয়নৰ শিখৰত তোলা সম্পৰ্কীয় বহুতো বাতৰি প্ৰকাশ পাই আছিল (মোডী মেনিয়া তেতিয়াও অহা নাই)। মই যিমানদূৰ দেখিলো সঁচাই ৰাস্তা ঘাট যথেষ্ট আহল-বহলকৈ আৰু বহুত সুন্দৰকৈ পৰিকল্পিতভাৱে নিৰ্মাণ কৰা যেন লাগিল। কিন্তু নিতীশ কুমাৰক মনে মনে প্ৰশংসা কৰিবলৈ লওতেই ঘাইপথ এৰি গ্ৰাম্য পথত গাড়ী চলিবলৈ ল’লে আৰু দুডালমান হাড়ে বিদ্ৰোহ কৰা যেন লাগিল। উন্নয়নৰ ফটাঢোল তৰুণ গগৈ কিম্বা নিতীশ কুমাৰ যিয়েই নিপিটক, সেই ঢোলৰ শব্দৰ চৰিত্ৰযে একে বুজি পাবলৈ মোৰ বেছি সময় নালাগিল। যাত্ৰা যি ঠাইত শেষ হ’ল, তাত গাড়ীৰপৰা নামি কিন্তু সেয়া বিবাহস্থলী যেন নালাগিল। ভালকৈ চাই দেখিলো সৰ্বশিক্ষা অভিযানৰ ফলক লাগি থকা এখন প্ৰাথমিক বিদ্যালয় প্ৰাংগণতহে সকলো গোট খাইছে। মই ভাবিলো ইয়াত হয়তো বিদ্যালয় প্ৰাংগণতে বিয়া পাতিব পাৰে। বিদ্যালয়ৰ ভিতৰত বেছ আৰামী আসন পাৰি থোৱা আছিল, তাতেই সকলোকে বহুৱালে আৰু গ্লুক’জ পানীৰে আপ্যায়ন কৰিলে। তাৰ পিছতেই বৰযাত্ৰী হৈ অহা মোছাল বৃদ্ধকেইজনে লৈ অহা তিনিটামান ব্ৰীফকেচ কইনাপক্ষক হস্তান্তৰ কৰিলে। ব্ৰীফকেচকেইটাত কি আছিল জানিবলৈ কৌতুহল উপজিলেও সেয়া জানিবলৈ কোনো উপায় নাছিল। অৱশ্যে তৰিৎগতিত কঢ়িয়াই নিয়া দেখি সেইকেইটা খালী যেনো লাগিল, কিন্তু খালী ব্ৰীফকেচ কিয় দিব, নিশ্চয় উপহাৰেৰে ভৰাই দিছে বুলি ভাবি ল’লো। অলপ পিছতেই বিদ্যালয় প্ৰংগণত তীব্ৰ শব্দৰে গান-নাচ চলিবলৈ ধৰিলে, মোৰ বাবে সেয়া আছিল আকৰ্ষণীয়। যেন হিন্দী চিনেমাত দেখা বিয়া এখনতহে উপস্থিত আছিলো মই। আধাঘন্টামানৰ পিছত বিদ্যালয় এৰি বৰযাত্ৰীসকলক বেণ্ডপাৰ্টিৰ গীত-নৃত্যৰে আগবঢ়াই লৈ গ’ল। তেনেই সৰু ৰাস্তাটোৰ দুয়োপিনে মাজে মাজে দেখিছিলো চাপৰ মাটিৰে সঁজোৱা ঘৰ একোটাৰপৰা ‘বাৰাত’ চাবৰ বাবে ওলাই আহিছে উৱলি যোৱা কাপোৰেৰে ওৰণি লৈ থকা মহিলা আৰু মলিয়ন সাজেৰে কেইটামান ল’ৰা ছোৱালী। প্ৰায় এক কিলোমিটাৰ মান খোজকাঢ়ি যোৱা ৰাস্তাত একেই দৃশ্য। অৱশেষত তীব্ৰ আলোকেৰে আলোকিত ঠাইডোখৰ দেখিয়েই গম পালো সেয়াই বিয়াঘৰ। দৰিদ্ৰ গাঁওখনৰ মাজত যে তেনে এক পৰিৱেশ পামগৈ অলপ আগলৈকে ভাবিবই পৰা নাছিলো। কইনাপক্ষৰ আদৰণিৰ মাজেৰে বিবাহস্থলীত বহিলোগৈ। লগে লগেই বিভিন্ন তৰহৰ মুখৰোচক খাদ্যবস্তু, শীতল পানীয়, ফল-মূলেৰে আপ্যায়ন আৰম্ভ হৈ গ’ল। প্ৰথম পৰ্যায়ৰ পিছত মূল ভোজতো আকৌ বিভিন্ন তৰহৰ খাদ্যবস্তুৰ সৈতে মিঠাই, আইচক্ৰীমলৈকে একো বাদ নপৰিল। মুঠতে মই আগেয়ে নেদেখা এক পৰিৱেশ। বিয়াৰ প্ৰত্যেকটো স্তৰতে কইনাপক্ষই নিজৰ চহকী অৱস্থাৰ পৰিচয় দিবলৈ চেষ্টা কৰা বুলি স্পষ্টকৈয়ে বুজি পোৱা যায়। এপেট খাই আমি কেইজনমান বন্ধুৱে কইনাঘৰৰ পদুলিলৈ ওলাই গৈছিলো। গৈ যি দেখিলো সেয়া বহুদিনলৈকে মোৰ চকুৰ আগত ভাহি থাকিল। কইনাঘৰৰ পদূলিত উচ্চগ্ৰামত বাজি আছিল ভোজপুৰী গীত অহৰহ। আৰু ঠিক বিপৰীত দিশত তেনেই চাপৰ মাটিৰ ঘৰ এটিৰ মজিয়াত শিশু এটিক সাৱটি শুই আছিল এগৰাকী মহিলা। বিয়াঘৰৰ উজ্জল পোহৰে পোহৰাই তুলিছিল খোলা দুৱাৰেৰে(আচলতে দুৱাৰ নাছিলেই, মাটিৰ ঘৰটোত ওলোৱা সোমোৱা কৰিবলৈ ৰখা বহল বাট এটাহে আছিল বোধকৰো!) ঘৰটোৰ মজিয়ালৈকে। কাণ তাল মৰা শব্দ অথবা উজ্জল পোহৰ সকলো নেওচি শুই আছিল সেই মহিলা নিজ শিশুক সাৱটি। হয়তো বিগত দিনটোৰ শ্ৰম আৰু অনাগত দিনটোত পুনৰ কৰিবলগীয়া সংগ্ৰামৰ চিন্তাই মানুহগৰাকীক উচ্চগ্ৰামৰ শব্দ আৰু পোহৰক অৱজ্ঞা কৰিবলৈ বাধ্য কৰিছিল। অলপ দুৰৈত আছিল আৰু এটা একেধৰণৰ ঘৰ। খোলা দুৱাৰ। কিন্তু বিয়াঘৰৰ পোহৰে তাৰ মজিয়া চুবলৈ পোৱা নাছিল। নহ’লে হয়তো তাতো দেখিলোহেতেন অনুৰূপ দৃশ্য। মোৰ বাৰে বাৰে অনুৰাধা শৰ্মা পূজাৰীৰ ‘চাহেবপুৰা’লৈ মনত পৰিছিল। ঘটনাক্ৰমে বিহাৰৰ সেই গাঁওখনলৈ গৈ মইও যেন অন্য এক চাহেবপুৰাৰ প্ৰতিচ্ছবিয়েই দেখিছিলো। য’ত দৰিদ্ৰ জনগনক এতিয়াও কোনো চৰকাৰী উন্নয়ন আচনিয়ে চুবগৈ পৰা নাই।

বিবাহ মণ্ডপলৈ উভতি আহিছিলো। বিয়াৰ আনুস্থানিকতাবোৰ চাই বহি থাকোতে বন্ধু এগৰাকীয়ে সুধিছিল – কেনে দেখিছ বিহাৰৰ বিয়া? তহঁতৰ অসমতো একেধৰণেই বিয়া হয়নে? মই উত্তৰ দিছিলো – অসমৰ মানুহেও বিয়াত খুউব ফুৰ্তি কৰে। কিন্তু ৰীতি- নীতিবোৰ অলপ বেলেগ। ওচৰতে বহি থকা যুৱক এজনে মাজতে মাত লগালে- ‘তুমি অসমৰ নেকি?’ মই অলপ ভয়েই খাই গৈছিলো হঠাৎ অচিনাকি(সম্ভৱত: কইনাপক্ষৰ আছিল তেওঁ) এজনৰপৰা প্ৰশ্ন শুনি। তথাপি তেওঁক জনালো যে হয়, মই অসমৰ। বেছ উচ্ছাসেৰে তেওঁ ক’বলৈ আৰম্ভ কৰিলে – ‘তোমালোকৰ বিয়াবোৰ চাগে খুউব ধুনীয়া হয় নহয়নে? খৰছো চাগে’ বেছি নহয়।’ মই সুধিলো কিয় তেনেকৈ কৈছে। তেওঁ মোক জনালে তেওঁ টিভিত দেখিছে অসমৰ মানুহে যৌতুক নলয়। ছোৱালীয়ে নিজৰ ঘৰৰপৰা একো লৈ যাব নালাগে। বৰ ভাল কথা। ‘হামাৰে য়াহা তো দহেজ কে নাম চে কংগাল হোনা পৰতা হেয়’। প্ৰথমবাৰৰ বাবে অসমৰ বাহিৰত অসমীয়াৰ বিষয়ে ইমান ধুনীয়াকৈ প্ৰশংসা শুনি মোৰ বুকুখন আধাফুটমান বহল হৈ গ’ল। অসমীয়া সমাজত যে যৌতুকৰ স্থান নাই, অসমীয়াই যে যৌতুক কেতিয়াও নলয় সেই বিষয়ে তেওঁৰ আগত ভালকৈ বক্তৃতা এটা দি আহিলো। সেই বিহাৰী যুৱকেও মোৰ কথাবোৰ শুনি মুগ্ধ হোৱা যেন লাগিল। এতিয়াও অসমীয়া বাতৰি কাকতৰ ভিতৰৰ পৃষ্ঠাত যেতিয়াই যৌতুকজনিত কাৰণত হত্যা, আত্মহত্যাৰ বাতৰি পঢ়িবলৈ পাও, সেই বিহাৰী যুৱকজনৰ সপ্ৰশংস চাৱনিটো মনত ভাহি উঠে। বেচেৰাই চাগে’ এতিয়াও ভাবি আছে অসমীয়া মানুহে সঁচাই যৌতুক নলয় বুলি। অথচ যৌতুক নামৰ ব্যাধিটো অসমীয়া সমাজত ভালকৈয়ে শিপাইছে। টেলিভিছন চিৰিয়েলে মেহেন্দী আদি উত্তৰ ভাৰতীয় ৰীতি অসমীয়া বিয়াৰ মাজলৈ আমদানি কৰাৰ সমান্তৰালভাৱে যৌতুক বোলা ব্যাধিটোও বৰ বেয়াকৈ অসমীয়াৰ মানসিকতাত সুমুৱাই দিছে। যৌতুকজনিত হত্যা/আত্মহত্যাৰ বাতৰি কাকতৰ মাজৰ পৃষ্ঠাত বাতৰি হৈ ওলায়, আমি হেডলাইন পঢ়ি থৈ দিও আৰু অসমীয়াই যৌতুক নলয় বুলি গৌৰৱ কৰি থাকো। ভালকৈ মন কৰিলে দেখা যায়, যৌতুকজনিত ঘটনাবোৰত জড়িত সকলোবোৰ কিন্তু কোনো বাৰ্মা, গুপ্তা বা চেৰাউগী নহয়। অসমীয়াই যৌতুক নলয় বোলা গৌৰৱৰ মাজে মাজে কোনোবা শ্ৰীমতী কলিতা, হাজৰিকা বা বৰুৱা যৌতুকৰ বলি হৈয়েই আছে। আৰু বিজতৰীয়া প্ৰথাবোৰ খুব সহজেই আকোৱালি লোৱা অসমীয়া সমাজত এয়া হৈয়েই থাকিব। কোনোবা আমিৰ খান বা অন্য চেলিব্ৰিটীয়ে বছৰি কিমান অসমীয়া নাৰী যৌতুকজনিত অপৰাধৰ বলি হয় সেয়া ৰাষ্ট্ৰীয়ভাৱে সম্প্ৰচাৰিত টেলিভিছনত সমীক্ষাসহ দেখুৱাই নিদিয়ালৈকে আমিও হয়তো গৌৰৱ কৰিয়েই থাকিম ‘অসমীয়া ছোৱালীয়ে বিয়াত এটুকুৰা সূতাও নিজৰ ঘৰৰপৰা লৈ নাযায়’ বুলি।

সবিশেষ পঢ়ক »

জোনবাইৰ দেশত বহি:বিশ্বৰ উপস্থিতি? ‘গুগল মুন’ত বহিৰ্বিশ্বৰ যানৰ উপস্থিতি

“জোনবাইৰ দেশতে সাজিম গাওঁ এখনি

তৰায়ে জ্বলাব চাঁকি...”

জোনৰ দেশত ঘৰ সজাৰ সপোন পৃথিৱীবাসীৰ বাবে নতুন নহয়। পৃথিৱীৰ সীমা পাৰ হৈ মহাকাশৰ বুকুত নাও বাই জোনৰ বুকুত মানৱে পদাৰ্পণ কৰাৰো বহু বছৰ উকলিল। মাজে মাজে জোনৰ বুকুত কলনী স্থাপনৰ সপোন দেখি অহা হৈছে। মাৰ্ছ ওৱান নামৰ সংস্থাৰ উদ্যোগত আকৌ জোনবাইতকৈও দূৰৈত মঙল গ্ৰহত মানৱ বসতি স্থাপনৰ প্ৰচেষ্টা ইতিমধ্যেই আৰম্ভ হৈছে। কিন্তু মানৱ জাতিৰ এনেবোৰ প্ৰচেষ্টাৰ মাজতেই যেন বহিৰ্বিশ্বৰ প্ৰাণীয়ে আহি জোনবাইৰ বুকুত পদাৰ্পণ কৰিলেহি। শেহতীয়াকৈ WowForReel নামৰ ভৌতিক শক্তিৰ ওপৰত অধ্যয়ন আৰু ছবি নিৰ্মাণ কৰা সংস্থা এটাই মুকলি কৰা কিছু আলোকচিত্ৰ আৰু ভিডিঅ’ই তেনে ইংগিতেই কৰিছে। উক্ত সংস্থাটোৱে Google Moon (Google Mapsঅৰ চন্দ্ৰপৃষ্ঠৰ মানচিত্ৰ সংস্কৰণ) অৰ সহায়ত চন্দ্ৰপৃষ্ঠত এক ত্ৰিকোণীয় মহাকাশযানসদৃশ ‘বস্তু’ৰ 

সৌজন্য: YouTube/wowforreel

উপস্থিতি ধৰা পেলাইছে। এই ত্ৰিকোণীয় আয়তনটো আচলতে কি তাক লৈ নিশ্চিত নহলেও কোৱা হৈছে এয়া হয়তো কোনো বহিৰ্বিশ্বৰ বুদ্ধিমান প্ৰাণীয়ে লৈ অহা মহাকাশযান। যিয়ে চন্দ্ৰপৃষ্ঠত অৱতৰণ কৰিছে আৰু হয়তো তাৰপৰাই পৃথিৱীৰ ওপৰত দৃষ্টি নিবদ্ধ কৰি ৰৈছে। এই ত্ৰিকোণীয় আৰু দুই পিঠীয়া বস্তুটোৰ দুই কাষত আকৌ প্ৰায় ৯০° কোণত কেইটামান ডটচিহ্ণ পৰিস্কাৰকৈ দেখা গৈছে। শুনিলে হলিউডৰ কল্পবিজ্ঞান কাহিনীৰ চিনেমাৰ দৃশ্য যেন লাগিলেও এই ত্ৰিকোণীয় বস্তুটোৰ উপস্থিতি কিন্তু সঁচা আৰু ইয়াকে লৈ আৰম্ভ হৈছে জল্পনা কল্পনাৰ। আপোনাৰ হয়তো মনত পৰিব, ‘ইণ্ডিপেন্দেন্স ডে’ শীৰ্ষক ছবিত বহিৰ্বিশ্বৰ প্ৰাণীয়ে পৃথিৱী আক্ৰমণ কৰিবলৈ জোনৰ বুকুতেই প্ৰথম প্ৰদাৰ্পণ কৰে। ট্ৰান্সফৰ্মাৰ ৩ নামৰ ছবিখনতো চন্দ্ৰপৃষ্ঠত বহি:বিশ্বৰ প্ৰাণীয়ে অৱতৰণ কৰা দেখুওৱা হৈছিল। এতিয়া গুগল মুনত দেখা যোৱা ছবিখন প্ৰকৃততে কি সেয়া অধিক পৰীক্ষা-নিৰীক্ষাৰ অন্ততহে জানিব পৰা হ’ব। ইতিমধ্যে Techandgadgetnews নামৰ ৱেবছাইটটোত কোৱা হৈছে যে এই অসাধাৰণ বস্তুটো এখন উৰাজাহাজৰ পাখি দুখনৰ সৈতে সমূখভাগৰ সৈতে সাদৃশ্য আছে, আৰু বৰ্তমানলৈকে উদ্ভাৱন হোৱা গোপন বিমানৰ দৰেই যদিও ই পৃথিৱীত নিৰ্মাণ হোৱা যিকোনো বিমানতকৈ বহুগুণে ডাঙৰ। জোনৰ লুণাৰ ছাৰফেচত দেখা যোৱা এই বস্তুটোৰ অন্য কোনো গ্ৰহ বা উপগ্ৰহতেই পৃথিৱীবাসীয়ে চলোৱা অভিযানৰ কোনো যানৰ স’তেও সাদৃশ্য বিচাৰি পোৱা হোৱা নাই। অধিক পৰীক্ষাইহে এয়া আচলতে বহিৰ্বিশ্বৰ মহাকাশযান নে ফটোগ্ৰাফীত হোৱা কোনো পৰিঘটনা সেয়া নিশ্চিত কৰিব পাৰিব।

সবিশেষ পঢ়ক »

গুগল এডচেনচ (Google Adsense) কি? কেনেকৈ ব্যৱহাৰ কৰিব?

গুগল এডচেনচ ইন্টাৰনেট মাৰ্কেটিঙৰ আতাইতকৈ জনপ্ৰিয় ব্যৱস্থা । গুগল এডচেনচ হৈছে গুগলৰ

বিজ্ঞাপন সেৱা । সেৱা বোলাতকৈ ব্যৱসায় বুলিলেহে শুদ্ধ হ'ব । বিভিন্ন প্ৰতিস্থানে গুগল এডচেনচৰ জৰিয়তে নিজৰ সামগ্ৰীৰ বিষয়ে বিজ্ঞাপন দিয়ে । আৰু গুগলে সেই বিজ্ঞাপন বিভিন্ন ৱেবছাইটৰ জৰিয়তে ইন্টাৰনেট ব্যৱহাৰকাৰীৰ ওচৰ পোৱায় । এই বিজ্ঞাপনসমূহ আকৌ বিভিন্ন প্ৰকাৰৰ হ'ব পাৰে । কিছুমান হ'ব পাৰে CPM (Cost Per Million) অৰ্থাৎ প্ৰতি ১০০০ বাৰ দৰ্শনৰ মূৰত নিৰ্দিষ্ট পৰিমাণৰ ধন বিজ্ঞাপন প্ৰদৰ্শিত হৈ থকা ৱেবছাইটৰ গৰাকীয়ে লাভ কৰিব । অন্য এক প্ৰকাৰ হ'ল PPC (Pay Per Click) । এই প্ৰকাৰৰ বিজ্ঞাপন ৱেবছাইটত প্ৰদৰ্শন কৰিলেই ৱেবছাইটৰ গৰাকীয়ে ধন লাভ নকৰে, লাভ কৰিব যদিহে বিজ্ঞাপনত কোনোৱে টিপা (Click) মাৰিছে । প্ৰতি ক্লিকৰ বাবদ ৱেবছাইটৰ গৰাকীয়ে ধন লাভ কৰিব ।  গুগলে কেতিয়াও এটা ক্লিকৰ পৰা কিমান উপাৰ্জন কৰিব পাৰিব সেয়া জানিবলৈ নিদিয়ে । সাধাৰণতে এই পৰিমাণ .০১ চেন্টৰ পৰা ৪ ডলাৰলৈকে হ'ব পাৰে । বেছি উপাৰ্জনকাৰী বিজ্ঞাপন  নিৰ্ভৰ কৰে ৱেবছাইটটোত থকা সমল কিমান উন্নত মানদণ্ডৰ তাৰ ওপৰত । যিহেতু গুগল এডচেনচৰ পৰা গুগলে বাৰ্ষিক মুঠ ৰাজহৰ ৬৮% উপাৰ্জন কৰে, গতিকে বিজ্ঞাপনসমূহৰ বাবদ বিজ্ঞাপনদাঁতাৰ পৰা গুগলে যিমান ধন লাভ কৰে, তাৰ এটা অংশহে বিজ্ঞাপন প্ৰদৰ্শন কৰা ৱেবছাইটৰ গৰাকীয়ে লাভ কৰে । আৰু যিসমূহ ৱেবছাইট অধিক জনপ্ৰিয় আৰু অধিক ব্যৱহাৰকাৰী থকা ৱেবছাইটত বেছি লাভজনক বিজ্ঞাপন সংস্থাপন কৰে ।

যিহেতু এয়া এক বিশুদ্ধ ব্যৱসায়, বিভিন্ন ব্যৱসায়িক Terms and Conditions জৰিত হৈ আছে । ভূৱা ক্লিক (click fraud) ধৰা পেলাবৰ বাবেও গুগলৰ বিভিন্ন ব্যৱস্থা আছে । আপুনি হয়তো ভাবিছে এই click fraud আকৌ কি ? নতুন এডচেনচ ব্যৱহাৰকাৰীসকলে সাধাৰণতে বেছি উপাৰ্জনৰ আশাত নিজেই নিজৰ ৱেবছাইটত থকা বিজ্ঞাপনত বাৰে বাৰে ক্লিক কৰে অথবা কোনো বন্ধুৰ হতুৱাই ক্লিক কৰোৱায় । কিছুমান ৱেব ডিজাইনাৰে আকৌ কোনোৱে ক্লিক নকৰিলেও নিজে নিজেই ক্লিক হোৱাকৈ প্ৰগ্ৰাম লিখি থ'ব পাৰে । এনে ধৰণৰ ভুৱা ক্লিক ধৰা পেলাবলৈ গুগলে কঠোৰ ব্যৱস্থা গ্ৰহণ কৰে । কেৱল ৱেবছাইট বা ব্লগ এটাৰ গৰাকী হ'লেই যে গুগল এডচেনচৰ জৰিয়তে বিজ্ঞাপন দিব পাৰিব তেনে নহয় । বৰ্তমান গুগলৰ পলিচি অনুসৰি এবছৰ বা ততোধিক সময় অতিক্ৰম কৰা, আৰু উচ্চ মানবিশিষ্ট ৱেবছাইটহে গুগল এডচেনচ বিজ্ঞাপনৰ বাবে বিবেচিত হয় ।

এই কথা মিছা নহয় যে বহুতো ৱেবছাইট বিজ্ঞাপনৰ জৰিয়তে উপাৰ্জন কৰা ধনেৰেই চলি আছে । আৰু বহুতেই ৱেবছাইট নিৰ্মাণ নতুবা ব্লগিং পেছা হিচাপে গ্ৰহণ কৰি বৃহৎ পৰিমাণৰ উপাৰ্জন কৰি আছে । Most earning bloggers বুলি গুগলত সন্ধান কৰিলেই আটাইতকৈ বেছি উপাৰ্জনকাৰী ব্লগাৰসকল আৰু তেওলোকৰ চকু কঁপালত তুলিব পৰা বাৰ্ষিক আয় জানিব পাৰিব । 

এডচেনচে বৰ্তমান ৩৬ টা ভাষাৰ ৱেবছাইটত বিজ্ঞাপন দিয়ে । দূ:খবৰ যে ভাৰতীয় ভাষাসমূহক এতিয়ালৈকে এই তালিকাত অন্তৰ্ভুক্ত কৰা হোৱা নাই ।

পুনশ্চ: সাধাৰণ দৃষ্টিত গুগল এডচেনচৰ জৰিয়তে ধন উপাৰ্জন কৰাটো বৰ সহজ যেন লাগিলেও দৰাচলতে কথাটো তেনে নহয় । প্ৰথম কথা এডচেনচ বিজ্ঞাপনৰ বাবে বিবেচিত হ'বলৈকে আপোনাৰ ৱেবছাইট বা ব্লগটোৱে প্ৰতিমাহে যথেষ্টসংখ্যক visitor পাব লাগিব । দ্বিতীয়, আপোনাৰ ৱেবছাইটলৈ অহা visitor য়ে আপোনাৰ ৱেবছাইটৰ পৰা তথ্য জানিবলৈহে আহিব, প্ৰতিজনেই যে বিজ্ঞাপনত ক্লিক কৰিব তেনে নহয় । তাৰ মাজৰেই দুই এজনে কৌতুহলবশত: দুই এটা বিজ্ঞাপনত ক্লিক কৰি দিবও পাৰে । যদি আপোনাৰ ৱেবছাইটত গুগলে দিয়া বিজ্ঞাপনসমূহ অধিক দামী নহয়, মানে যদি প্ৰতি ক্লিকত কেৱল .০১ ডলাৰমানকৈহে খৰছ কৰা হৈছে, তেন্তে আপোনাৰ উপাৰ্জন সহজেই অনুমেয় । তৃতীয়, আগতেই উল্লেখ কৰা হৈছে যে এয়া এক ব্যৱসায় । গতিকে, অন্য ব্যৱসায়ত থকাৰ দৰেই তীব্ৰ প্ৰতিযোগিতা অনলাইন ব্যৱসায়তো আছে । আপুনি আপোনাৰ ৱেবছাইটত যি কথা লিখিছে, সেই ধৰণৰ কথা থকা অন্য হাজাৰোধিক ৱেবছাইট পূৰ্বৰপৰাই ইন্টাৰনেটত থাকিব পাৰে । গতিকে, গুগলে কেতিয়াও প্ৰথমে আপোনাৰ ৱেবছাইটলৈ নিৰ্দেশ নকৰি অন্য ৱেবছাইটলৈ নিৰ্দেশ কৰিব । এডচেনচৰ সদস্য হোৱা মানেই একপ্ৰকাৰ আপুনি গুগলৰ ব্যৱসায়িক অংশীদাৰ হৈছে, গতিকে ব্যৱসায়ত লোকচান হ'বপৰা কোনো কামেই গুগলে সহ্য নকৰে । অৱশ্যে গুগল এডচেনচৰ দৰে অন্য বহুতো ad-serving প্ৰতিস্থান আছে । অসমীয়া ভাষাৰ ৱেবছাইট বা ব্লগত বিজ্ঞাপনৰ বাবে Chitika, bidvertiser আদি চাব পাৰে । 

সংযোগ: https://www.google.com/adsense/
(অন্য এটা ব্লগৰ পূৰ্বে প্ৰকাশিত লেখা। ব্লগিং আৰু এডচেনচ সম্পৰ্কীয় আৰু কিছু লেখা বিস্তাৰিতভাৱে অচিৰেই প্ৰকাশ কৰা হ'ব।)

সবিশেষ পঢ়ক »

গুগলৰ নতুন Chromecast : টেলিভিছন সংযোগী প্ৰযুক্তি

শেহতীয়াকৈ উচ্চ প্ৰযুক্তিসম্পন্ন হাৰ্ডৱেৰ নিৰ্মাণত  বিশেষ গুৰুত্ৱ দিছে গুগলে । বিগত বৰ্ষত গুগল গ্লাছ মুকলিৰে প্ৰযুক্তিৰ বজাৰত চাঞ্চল্যৰ সৃষ্টি কৰা গুগলে এইবাৰ বজাৰত মুকলি কৰিবলৈ ওলাইছে

Chromecast . গুগল গ্লাছে আমেৰিকা যুক্তৰাষ্ট্ৰৰ বজাৰত সমাদৰ পাবলৈ ধৰাৰ সময়তে Chromecast মুকলিৰ ঘোষণাক তাৎপৰ্যপূৰ্ণ বুলি ভবা হৈছে। যদিও Appleৰ পৰা ধাৰণা(concept) চুৰি কৰি গুগল গ্লাছ নিৰ্মাণ কৰা বুলি অভিযোগ উঠিছিল, শেহতীয়াকৈ আমেৰিকাৰ বজাৰত সমাদৃত হ'বলৈ লৈছে Google Glass. এনে সময়তে গুগলে ঘোষণা কৰিছে উচ্চ প্ৰযুক্তিৰে নিৰ্মিত টেলিভিছন ডংগ'ল Chromecast . উল্লেখ্য যে ইয়াৰ জৰিয়তে গুগলে একে ধৰণৰ Apple TVৰ সৈতে প্ৰতিযোগিতা কৰিবলৈ সক্ষম হ'ব বুলি ধাৰণা কৰা হৈছে । Chromecastৰ জৰিয়তে HBO কে ধৰি কেইবাটাও টেলিভিছন চেনেলৰ কাৰ্যক্ৰমণিকা সম্প্ৰচাৰ কৰাৰ লগতে YouTube, Vimeo, Netflix আদি ভিডিঅ' সম্প্ৰচাৰণ ৱেবছাইট, songza, Pandora আদিৰ সংগীত পোনপটীয়াকৈ উপলব্ধ হ'ব । লগতে বিভিন্ন App ডাউনল'ডৰ বাবে থাকিব Google Play.

            দেখিবলৈ এটা পেনড্ৰাইভৰ দৰে আৰু আকাৰতো তেনেই ক্ষুদ্ৰ Chromecastক টেলিভিছনৰ HDMI portৰ সৈতে সংযুক্ত কৰিলেই ই সক্ৰিয় হৈ পৰিব আৰু Chromecastৰ সকলো সেৱা উপভোক্তাই গ্ৰহণ কৰিব পাৰিব । স্মাৰ্টফোনকে ধৰি অন্য কিছু সমলৰপৰা Streaming media(ভিডিঅ', অডিঅ' আদি) গ্ৰহণ কৰিব পৰাৰ ক্ষমতা থাকিব Chromecastঅৰ ।

  আমেৰিকা যুক্তৰাষ্ট্ৰৰ বজাৰত $35 মূল্যৰে মুকলি কৰিবলগা Chromecastঅক  গোলকীয় বজাৰত কেতিয়াকৈ মুকলি কৰি দিয়া হ'ব সেই সম্পৰ্কীয় কোনো আচনি গুগলৰ তৰফৰ পৰা সদৰী কৰা হোৱা নাই । টেলিভিছন চেনেল উপভোগ কৰাৰ লগতে ৱেবকাষ্টৰ সুবিধা থকা এই প্ৰযুক্তিয়ে ব্যৱহাৰকাৰীৰ পৰা কেনে সমাদৰ পায় সেয়া হ'ব লক্ষণীয় ।
(পূৰ্বে অন্য এটা ব্লগত লিখা এই লেখাটো ইয়ালৈ আনি সেই ব্লগটো অপ্ৰকাশিত কৰি দিলো।)

সবিশেষ পঢ়ক »

Ubuntu Linux ত অসমীয়া লিখাৰ সহজ পদ্ধতি

Ubuntu ত অসমীয়া লিখিবলৈ ibus আৰু ibus-m17n নামৰ দুটা package install কৰি ল'ব লাগিব । 

IBus(Intelligent Input Bus) হৈছে Unix variant অপাৰেটিং চিষ্টেমত বহুভাষিক এক input method framework. Ubuntu v9.10 আৰু Fedora 11 বা তাৰ পৰৱৰ্তী সংস্কৰণসমূহত ibus ক default input method হিচাপে অন্তৰ্ভূক্ত কৰা হয় (পূৰ্বৰ SCIM-ৰ সলনি) । ibus-m17n হৈছে এক ibus input engine যি অসমীয়াকে ধৰি অন্য এছীয় ভাষাসমূহক তালিকাভুক্ত কৰে ।

১। ibus আৰু m17n package দুটা install কৰিবলৈ terminalৰ পৰা তলৰ command দুশাৰী চলাওক :

sudo apt-get install ibus

sudo apt-get install ibus-m17n

২। এতিয়া Unity (Windows key) ৰ পৰা ibus সন্ধান কৰক বা System->Preference->ibus ত click কৰক । 

৩। Unity panel বা Gnome Panelত এখন কীবৰ্ডৰ icon দেখিবলৈ পাব ।

 কীব'ৰ্ড খনত Click কৰি Preference বাচনি কৰক ।

৪। IBus Preferences নামৰ নতুন Window এখন খুলিব ।

 'Input Method' tabটো বাচনি কৰি 'Customize active input Methods' optionটো অংকিত কৰক । 

৫। Select an input method ত click কৰিলে ibusত উপলব্ধ বিভিন্ন ভাষাসমূহৰ তালিকা দেখিবলৈ পাব । Assamese বাচনি কৰি তিনিটা input method দেখিবলৈ পাব । 

phonetic, inscript বা itrans যিকোনো এটা বাচনি কৰি সোফালে থকা 'Add' button টোত click কৰক । এইদৰে phonetic, inscript, itrans তিনিওটা input method য়েই যোগ কৰি লওক আৰু IBus Preference বন্ধ কৰক ।

৬। যিকোনো text editor ত অসমীয়াত টাইপ কৰিবলৈ এতিয়া আপোনাৰ Unity Panel ত থকা কীব'ৰ্ড চিহ্নটোত click কৰি Assamese-phonetic, Assamese-inscript বা Assamese-itrans বাচনি কৰি লওক ।

টাইপ কৰি থাকোতে Ctrl+Space টিপি ভাষা সলনি কৰিব পাৰিব ।

আপোনাৰ সুবিধা অনুযায়ী কীব'ৰ্ডৰ সজ্জা সলনি কৰি ল'বও পাৰে । তাৰবাবে আপুনি /usr/share/m17n directory ত থকা যিকোনো .mim file সম্পাদনা কৰি ল'ব লাগিব । উদাহৰণ স্বৰূপে যদি আপুনি phonetic কীব'ৰ্ডখন সম্পাদনা কৰিব খুজিছে, তেন্তে Terminalৰ পৰা তলৰ নিৰ্দেশ টো চলাওক । 

sudo gedit /usr/share/m17n/as-phonetic.mim  

এতিয়া Text Editor ত phonetic কীব'ৰ্ডৰ বাবে থকা সংকেত দেখিবলৈ পাব । এই সংকেতসমূহ LISP ত লিখা । অৱশ্যে সম্পাদনা কৰিবলৈ আপুনি LISP syntax জনাৰ বিশেষ প্ৰয়োজন নাই । ফাইলটো পঢ়ি গ'লে আপুনি এঠাইত এইদৰে পাব :

(map

 (trans

  ((KP_1) "১")

  ((KP_2) "২")

.....

ইয়াত বন্ধনীৰ ভিতৰত থকা (X,Y) ৰ X হৈছে ইংৰাজী কীব'ৰ্ডত থকা প্ৰকৃত আখৰ আৰু Y হৈছে X ৰ বিপৰীতে অসমীয়া বৰ্ণ । আপুনি যদি 'k' ৰ বাবে 'ক', 'm' ৰ বাবে 'ম' আৰু 'v' ৰ বাবে ' ং' পাব খুজিছে তেন্তে এইদৰে সম্পাদনা কৰক:

("k" ?ক) 

("m" ?ম)

("v" ?ং)

অথবা ("k" "ক") এইদৰেও লিখিব পাৰে । এইদৰে সকলো keyৰ বাবে আপোনাৰ পচন্দ অনুযায়ী mapping কৰি ফাইলটো save কৰক । Ubuntu Reboot কৰি লওক আৰু এইবাৰ আপুনি নতুনকৈ সাজি লোৱা কীব'ৰ্ডেৰে টাইপ কৰিব পাৰিব ।

এইখিনিতে ল'বলগীয়া এক বিশেষ সাৱধানতা হ'ল '\' আৰু " ক শুদ্ধকৈ map কৰিবলৈ আগত এটা \ যোগ কৰিব লাগিব । যেনে 

("\\" "এ")

("\"" "্য") 

এতিয়া আপুনি '\' টাইপ কৰিলে 'এ' আৰু " ৰ বাবে '্য' পাব । LISP ত '\' আৰু ' " ' ক special character হিচাপে ব্যৱহাৰ কৰা হয় আৰু সেয়ে এটা অতিৰিক্ত '\' যোগ নকৰিলে ফাইলটোৰ বাকী অংশ parserয়ে comment হিচাপে গণ্য কৰি ল'ব আৰু আপুনি সকলো শুদ্ধকৈ কৰাৰ পিছতো আশাকৰা ধৰণে আপোনাৰ কীব'ৰ্ডখনে কাম নকৰিব ।

.mim file সম্পাদনা কৰাৰ সলনি আপুনি নতুনকৈ সাজিও নতুন এক input method যোগ কৰিব পাৰে । কেনেকৈ যোগ কৰিব তাৰ উদাহৰণ হিচাপে মই মোৰ ব্যৱহাৰৰ বাবে সাজি লোৱা binapani লৈছো :

১। প্ৰথমে তলৰ লিংকটোৰ পৰা বীণাপানি ডাউনল'ড কৰি লওক ।

https://dl.dropbox.com/u/72964378/binapani.tar.gz

  ২। Terminal ৰ পৰা তলৰ নিৰ্দেশটো চলাওক:

 tar -xzf ./Downloads/binapani.tar.gz -C ./Desktop

৩। Desktopত as-binapani.mim আৰু as-binapani.png নামৰ দুটা ফাইল দেখিবলৈ পাব । এই ফাইলটো সম্পাদনা কৰিব বিচাৰিলে তলৰ নিৰ্দেশটো চলাওক :

gedit ./Desktop/as-binapani.mim

৪। সম্পাদনা কৰা হোৱাৰ পিছত ফাইলটো /usr/share/m17n লৈ copy কৰক (Terminalত তাইপ কৰক: sudo cp ./Desktop/as-binapani.mim /usr/share/m17n) আৰু icon fileটো /usr/share/m17n/icons ত ৰাখক (Terminalত টাইপ কৰক: sudo cp ./Desktop/as-binapani.png /usr/share/m17n/icons) ।

৫। এতিয়া m17n database আপোনাৰ নতুন input methodৰ সৈতে update কৰক । terminalত টাইপ কৰক:

sudo gedit /usr/share/m17n/mdb.dir

৬। text editorত mdb.dir ফাইলটোত Ctrl+f টিপি (input-method * "*.mim") সন্ধান কৰক । এই শাৰীটোৰ পিছতেই যোগ কৰক:

(input-method t as-binapani "as-binapani.mim") । mdb.dir ফাইলটো Save কৰক আৰু IBus Restart কৰি লওক ।

৭। আগতে কৰাৰ দৰে IBus Preference->Input Method->Select an input method-> Assamese ->binapani(m17n) যোগ কৰক । এতিয়া এই নতুন কীব'ৰ্ডেৰে আপুনি সহজেই টাইপ কৰিব পাৰিব ।

Ubuntu v12.04 ত কেতিয়াবা আপুনি কীব'ৰ্ড চিহ্নটো unity panel ত নেদেখিব পাৰে । অৰ্থাৎ IBus daemon চলি থকা নাই । IBus চলাবলৈ Terminal ৰ পৰা এই নিৰ্দেশটো চলাওক : ibus-daemon -rxd । এতিয়া আপুনি পুনৰ IBusৰ জৰিয়তে অসমীয়াত লিখিবলৈ সক্ষম হ'ব ।

সবিশেষ পঢ়ক »

এইদৰেই দিন ৰাতি

-->

বৰষুণৰ আকাশৰ দৰে বিজুলী চমকিছিল তেওঁৰ দুচকুত

অবিন্যস্ত চুলিৰ ভাঁজত তেওঁৰ হেঙুলীয়া আঙুলি

যেন বসন্তৰ সেউজীয়া পাৰঘাটত চমত্কাৰ এখন পানচৈ

দূৰণিত যেন চিলা উৰিছে -

(চিলা নে জোন? - অস্পষ্ট ! )

বুকুখন মোৰ কঁপি উঠে

ঠিক যেন এক অচিন জংচন অভিমূখী ৰেল

শেষনিশাৰ স্বপ্নক কঁপাই গৈ থাকে

সপোন বাঢ়ি আহে বেছিকৈ

খিৰিকী খুলিলেও সোমাই আহে সপোনবোৰ

আৰু মোক মেৰিয়াই বান্ধি যায়

অচিন বিষাদেৰে মোক কন্দুৱায়

জোনাকী পৰুৱাবোৰে বুকুৰ শিতানত তৰা হৈ সুহুৰিয়ায় ।

হঠাৎ

নিয়ৰৰ কণিকা হৈ বকুল এপাহত সৰি পৰিবৰ মন গ'ল

হঠাত্ দলং এখনেদি দৌৰি পাৰ হ'বলৈ মন গ'ল

হঠাত্ সোণাৰু হৈ ফুলিবৰ মন গ'ল

হঠাৎ

তেওঁৰ আঙুলিৰে

মোৰ কেচাঁ কলিজাক চুই চাবৰ মন গ'ল

তেওঁৰ আকাশত পুৱাৰ সূৰ্য হ'বলৈ মন গ'ল

যদি আমাৰ এখন উমৈহতীয়া আকাশ থাকিলহেতেন

যদি প্ৰতি দোকমোকালি তেওঁৰ আঙুলিত ধৰি জী উঠিব পাৰিলোহেতেন

যদি তেওঁৰ হাতত হাত থৈ পাৰ হৈ যাব পাৰিলোহেতেন

এই বিষণ্ণ দিনবোৰৰ সিপাৰলে'

দলং এখন বাঢ়ি আহে মোৰ চেতনাত

সংশয়ৰ নিশাবোৰ পিছলৈ ঠেলি

সম্ভাৱনাৰ সপোনবোৰ আগবাঢ়ে আজিও

যেন এক স্বপ্নৰ ৰেলগাড়ী !!

সবিশেষ পঢ়ক »

হেপী ভেলেন্টাইনচ ডে'

আজি পুনৰ তোমাৰ প্ৰেমত পৰিম

যান্ত্ৰিক বিলাসিতাৰ খৰছী উদযাপনৰ অংশীদাৰ হ'ম এবাৰ ।

জাহ যাম বাণিজ্যিক সভ্যতাৰ বহুৱালিবোৰত ।

তুমি নাজানা -

আকাশৰ ৰং নীলা নে বেঙুণীয়া

নাজানা গামখাৰু খায় নে পিন্ধে ।

জেতুকাবুলীয়া লিহিৰি হাতৰ পচোৱা তোমাৰ অচিনাকি

তুমি জানা মাথো পিংক লিপষ্টিক, ক'লা কাজল অথবা সোণালী হেনা ।

আৰ্চিছ কাৰ্ডৰ সন্মোহনত তুমি

সহজেই বিক্ৰী কৰা হৃদয়

ধূমায়িত আন্ধাৰত ডুব গৈ

ৰঙীণ পানীয়ৰ গিলাচত ওঠ জুবুৰিয়াই

তুমি সঘনাই পান কৰিব খোজা জীৱনৰ ৰস

সচাঁ মানুহৰ জীৱনী

সচাঁ মানুহৰ প্ৰেম

তোমাৰ বাবে অনৰ্থক পৃথিৱী

অনৰ্থক তোমাৰ বাবে

কিমান টোপাল ঘাম নাঙলৰ সীৰলুত মিলি

পৃথিৱী সাৰুৱা হয়

কিমান মৰ্মবেদনাত আত্মহত্যা কৰে

পাৰিশ্ৰমিকবিহীন শিক্ষকজনে

সংস্থাপনহীন যুৱকজনৰ ক্ষোভে

চুব নোৱাৰে কোনোদিনে

কাৰণ

ভোগবাদৰ ঔৰসত জন্মা তুমি যে এগৰাকী

আধুনিকা ডাইনী ।

আজি পুনৰ এবাৰ প্ৰেমত পৰিম তোমাৰ

সভ্যতাৰ পংকিলতা আৰু জটিলতাই কোঙা কৰা

হৃদয়খন উলিয়াই সমৰ্পণ কৰিম তোমাক

সুকোমল 'টেডি বিয়েৰ'ৰ উপহাৰেৰে ভৰুণ

তোমাৰ দুহাতলে' চাই

তোমাৰ স'তে একেলগে ক'ম -

হেপী ভেলেন্টাইনচ ডে' !!

সবিশেষ পঢ়ক »

এজাক বৰষুণৰ অপেক্ষাত

নামহীন ৰঙেৰে ৰঙাব খুজিছো আকাশখন

সপোনৰ পৃথিৱীত বাজিছে গৰখীয়া বাঁহীৰ সুৰ

সেই পৃথিৱীতে মোৰ সুৰীয়া সপোনৰ চ’ৰাঘৰ ।

মৰহা দিনবোৰ পাহৰি বুকুত গুজি দিও কপৌফুল

ক’ৰবাত জানোচা বাজি উঠা শুনো লাহৰী গগণা

জানোচা ক’ৰবাত ফুলি উঠে নাহৰ ফুলাৰ সমদল

জানোচা পাই যাও এজাৰ ফুলৰ মোহনাত

                        মোৰ আকাংক্ষিত ব’হাগ ...

মেঘমল্লাৰ ৰাগ হৈ এজাক বৰষুণ মাতিব পৰা হ’লে !

যি বৰষুণ সৰিব সকলোৰে কলিজাৰ কোহে কোহে

যি বৰষুণে জগাই তুলিব ভালপোৱাৰ উন্মাদনা

যি বৰষুণে মুক্ত কৰিব

কংক্ৰিট্ পৃথিৱীৰ বন্দী কেতেকীৰ কণ্ঠ ।

যি বৰষুণে জীপাল কৰি তুলিব চ’তৰ বতাহ

আৰু হৃদয়ৰ কন্দৰত অংকুৰিত কৰি তুলিব

কপৌফুলৰ দৰে কোমল, পেপাৰ সুৰৰ দৰে উন্মাদ

জেতুকাৰ বোলৰ দৰে ৰঙীণ

আমাৰ আকাংক্ষিত ব’হাগ

তেনে এজাক বৰষুণৰ অপেক্ষাত

ৰৈ আছো – পাহৰণি নামৰ বাট এটিৰ সিপাৰে

সবিশেষ পঢ়ক »

কেইটিমান স্তৱক

১. সপোনত

ৰৈ আছো –

চিৰালফটা হেপাঁহৰ দ্বীপ এটিত

বতাহত ভেজা দি ।

সেউজীয়া ধাননিৰ স্বপ্নই মাতিছে মাজনিশা টোপনিত

গৈ গৈ পাও নিৰ্জনতাৰ আকাশীলতা

মেৰিয়াই ধৰে মোক

কলিজাৰ ৰস চুহি খাবলে ।

২. তোমাৰ আৰু মোৰ

আমাৰ দুয়োৰে একেখনি আকাশ

য’ত তোমাৰ শেৱালি শুকুলা স্বপ্নৰ চিলা উৰে

য’ত তোমাক আৱৰি থাকে হেঙুলীয়া বেলি

আৰু মোৰ আশাৰ হেলিকপ্টাৰ উৰে

নীলা চৰাইৰ ডেউকাৰ আঁৰে আঁৰে ...

৩. আশা

মোৰ হাতত হাত থোৱা

কৃষ্ণচুড়াৰ দৰে ফুলি উঠো কিছুপৰ ।

সমূখৰ বাট ধূসৰ – নিৰ্জনতাৰ দৰে...

যাদুকৰী বতাহ এচাটি হৈ মোক লৈ যোৱা

পাৰ হৈ শিমলু ফুলৰ নৈ...

সবিশেষ পঢ়ক »

এখন আকাশ

সকলোৰে বুকুৱে বুকুৱে আকাশখন –

হৃদয় বৰণীয়া ।

বেলি উঠাৰ ছন্দধ্বনি শুনি য’ত তৰাবোৰে নাও মেলে

হেপাঁহৰ বসন্তই য’ত ভালপোৱাৰ গীত জোৰে ।

বনজুইৰ দৰে বাঢ়ে আশা –

কলিজাত মূখ গুজি আপুনি উভটিব খুজিছে

নেদেখা অতীতৰ সিপাৰলে’

কোনোবা এদিন আকাশখনৰ পৰিসীমাত

ৰামধেনুৱে গজালি মেলিব খোজা আবেলি

আপুনি যদি মেলি ধৰে নীলা ছাতি

হেৰুৱাব আপুনি বৰষুণৰ সংগসূখ

আৰু যদি মেলি দিয়ে বতাহী ডেউকা

আপুনিও চাগে’ এপলক উৰি চাব পাৰে

ভ্ৰমণ কৰি আহিব পাৰে টোকোৰা চৰাইৰ দেশ ।

চৰ্ত এটাই –

বুকুৰ দুৱাৰ খুলি

সোমাই পৰিব লাগিব আকাশখনৰ নীলিমাত ।

সকলোৰে বুকু্ৱে বুকুৱে আকাশখন

সাঁচিপাতৰ দৰে –

কৰুণতা আৰু বিশালতা একেলগে সামৰি ।

সবিশেষ পঢ়ক »