১. সপোনত
মোৰ হাতত হাত থোৱা
ৰৈ আছো –
চিৰালফটা হেপাঁহৰ দ্বীপ এটিত
বতাহত ভেজা দি ।
সেউজীয়া ধাননিৰ স্বপ্নই মাতিছে মাজনিশা টোপনিত
গৈ গৈ পাও নিৰ্জনতাৰ আকাশীলতা
মেৰিয়াই ধৰে মোক
কলিজাৰ ৰস চুহি খাবলে ।
২. তোমাৰ আৰু মোৰ
আমাৰ দুয়োৰে একেখনি আকাশ
য’ত তোমাৰ শেৱালি শুকুলা স্বপ্নৰ চিলা উৰে
য’ত তোমাক আৱৰি থাকে হেঙুলীয়া বেলি
আৰু মোৰ আশাৰ হেলিকপ্টাৰ উৰে
নীলা চৰাইৰ ডেউকাৰ আঁৰে আঁৰে ...
৩. আশা
মোৰ হাতত হাত থোৱা
কৃষ্ণচুড়াৰ দৰে ফুলি উঠো কিছুপৰ ।
সমূখৰ বাট ধূসৰ – নিৰ্জনতাৰ দৰে...
যাদুকৰী বতাহ এচাটি হৈ মোক লৈ যোৱা
পাৰ হৈ শিমলু ফুলৰ নৈ...